Basketbollistët e Borës kanë nisur vitin 2025 me fitore në elitën e basketbollit kosovar.
Të mërkurën mbrëma në Prishtinë, skuadra e Borës triumfoi ndaj Golden Eagle Yllit me shifrat 93:80, në ndeshjen që i takoi xhiros së 15-t të Superligës së Kosovës.
Në fakt, Bora u tregua skuadër më e mirë se Ylli dhe gjatë tërë ndeshjes ka dominuar për ta regjistruar fitoren e pestë në sezonin e saj debutues në Superligë.
Bora e fitoi çerekun e parë me shifrat 20:18, përpara se ta bëjë shkëputjen në të dytin. Periudhën e dytë, Bora e fitoi me rezultatin 23:12 për të shkuar në pushim me epërsi prej 13-të pikëve (43:30).
Avantazhin e krijuar, Bora arriti ta mbajë deri në fund të ndeshjes duke mos e rrezikuar fitoren.
Më efikasi në këtë fitore të Borës, ishte amerikani Desmond Cambridge, të cilin e transferoi javë më parë pasi u largua nga Trepça.
Cambridge ndeshjen e mbylli me 26 pikë të shënuara, ndërsa me lojë të mirë u veçuan edhe Jetmir Zeqiri (20 pikë, 8 kërcime) kurse Adem Mekiq shtoi 16 pikë, 13 kërcime e 9 asistime.
Te skuadra e Yllit, Jan Palokaj i rikthyer pati 26 pikë të realizuara por nuk arriti ta ndihmoj ekipin nga Suhareka ta evitoj humbjen nga Bora.
Me këtë fitore, Bora ka tubuar 20 pikë, një më pak se Ylli që regjistroi humbjen e tetë karshi shtatë fitoreve në 15-të ndeshje të luajtura këtë sezon.
