Sipas të dhënave të Administratës Tatimore të Malit të Zi, për shkak të bojkotit të dyqaneve të shtunën, më 8 shkurt, pesë rrjetet më të mëdha të shitjes me pakicë në këtë vend kanë regjistruar një rënie prej 30,23 për qind të qarkullimit krahasuar me 1 shkurtin.
Siç raporton agjencia malazeze MINA, dyqanet kanë realizuar 2,96 milionë euro xhiro më 8 shkurt, ndërsa qarkullimi më 1 shkurt, kur nuk ka pasur bojkot, ka qenë 4,24 milionë euro, shkruan AA.
Të dhënat e Administratës Tatimore tregojnë se qarkullimi ka rënë më së shumti në rajonin qendror të vendit, me 35,86 për qind.
Rajoni verior ka shënuar rënie të xhiros me 30,62 për qind, ndërsa në rajonin jugor ka pasur 21,5 për qind më pak të hyra në kasat e marketeve.
Numri i faturave të lëshuara ka qenë 18,15 për qind më i ulët.
Në vendet e rajonit të Ballkanit, përfshirë Malin e Zi, javët e fundit janë organizuar bojkote ndaj dyqaneve dhe supermarketeve për shkak të çmimeve të larta.
