Në takimin e 2 majit në mes të kryeministrit, Albin Kurti dhe presidentit të Serbisë, Aleksandar Vuçiq është miratuar Deklarata për Personat e Zhdukur.
Për këtë nënkryetarja e Kuvendit të Kosovës, Saranda Bogujevci ka thënë se pas një mohimi 24-vjeçar, Serbia pranoi krimin e zhdukjes me forcë.
“U nёnshkrua deklarata pёr personat e zhdukur me forcё gjatё luftës, përkundër rezistencës sё gjatё tё Serbisё. Pas mohimit 24 vjeçar, me këtë deklaratë Serbia pranon krimin e zhdukjes me forcë. Me këtë deklaratë e ngritë nevojën urgjente për përpjekje shtesë për të lehtësuar vuajtjet e familjeve. Gjithashtu për herë të parë pranon të ofrojë qasje në të gjitha materialet që do të ndihmojnë në gjetjen e personave të zhdukur me forcë – qofshin këto edhe materiale të klasifikuara.
Republika e Kosovës është e përkushtuar për të zbardhur zhdukjet me forcë gjatë luftës dhe për t’i dhënë fund ankthit të pritjes së familjarëve për të ditur fatin dhe vendndodhjen e më të dashurve të tyre. Deklarata na sjellë një hap më afër të vërtetës”.
Ajo tha se shpreson që “ky hap i rëndësishëm do të lehtësojë sado pak dhimbjen e familjarëve”.
