Qendra Kombëtare për Menaxhim Kufitar ka njoftuar se nga 14 prilli deri më 17 prill do të bllokohet për kamionë rruga Pejë–Rozhajë.
Sipas njoftimit, bllokimi vlen për segmentin në vendin e quajtur Dacaj, në territorin e Malit të Zi, dhe ka nisur nga ora 10:00 e mëngjesit të së martës.
“Rruga Pejë–Rozhajë, saktësisht në vendin Dacaj në territorin e Malit të Zi, do të bllokohet nga data 14.04.2026 prej orës 10:00 deri më 17.04.2026 në ora 10:00”, thuhet në njoftim.
Tutje bëhet e ditur se bllokimi ka të bëjë me kufizimet që u aplikohen shoferëve të kamionëve në Bashkimin Evropian, si dhe me disa kërkesa të tyre.
“Bllokimi i rrugës është vetëm për kamionë dhe lidhet me kufizimet e shoferëve në Bashkimin Evropian, si dhe me disa kërkesa të brendshme të tyre”, thuhet më tej.
Ndërkaq, për automjetet e vogla kjo rrugë do të mbetet e qarkullueshme gjatë gjithë kohës.
