Efekti i moskunstituimit të Kuvendit, ka filluar të ndjehet tek agjencitë e pavarura.
Gjashtë prej tetë anëtarëve të bordit të Agjencisë Kosovare të Privatizimit, në fillim të muajit gusht u skadoi mandati.
Për rrjedhojë, në këtë institucion nuk mund të ketë kuorum për çfarëdo vendimmarrje.
Emërimi i anëtarëve të bordit bëhet nga Kuvendi, por që një gjë e tillë është e pamundur derisa të bëhet konstituimi.
Kjo situatë, vlerësohet se pengon zhvillimin e institucionit të pavarur.
“Shkaktojnë probleme në kuorum. Nuk ka kuorum, nuk ka vendimmarrje efektive dhe jemi në një status quo. Nuk është vetëm ky rast, ka edhe raste të tjera. Është për keqardhje. Pengon zhvillimin e institucionit, pengon ushtrimin e detyrave, autorizimit dhe përgjegjësive të atij institucioni konkret të pavarur kushtetues. Por është e domosdoshme, sepse nuk kemi Kuvend. Pa pasur Kuvend dhe një Qeveri, atëherë nuk mund t’i rregullojmë këto gjëra”, tha profesori universitar, Mazllum Baraliu.
Por, çfarë pasoja sjellë mungesa e vendimmarrjes në AKP?
Për AKP, Qeveria Kurti II kishte paralajmëruar shuarjen e saj dhe themelimin e Fondit Sovran, por që një gjë e tillë nuk u realizua.
Tëvë1 ka tentuar të marrë një qëndrim nga Qeveria në detyrë rreth kësaj çështje, por të njëjtit nuk kanë kthyer përgjigje.
