Sekretari i shtetit amerikan, Antony Blinken, ka uruar 111 vjetorin e Pavarësisë së Shqipërisë.
Përmes një urimi, Blinken ka thënë se ShBA-të janë krenarë që bashkëpunojnë me Shqipërinë.
“Shtetet e Bashkuara janë krenare që punojnë me ju si aleatë dhe partnerë të NATO-s të angazhuar për të forcuar përpjekjet e Shqipërisë për reformën në drejtësi, për të çuar më tej bashkëpunimin tonë për sigurinë kibernetike dhe për të vazhduar mbështetjen tonë të palëkundur për Ukrainën përballë luftës së agresionit të Rusisë”, thuhet në urimin e Blinken.
Po ashtu, Blinken ka thënë se mbështesin integrimin e plotë të Shqipërisë në komunitetin euroatlantik.
“Ne ju falënderojmë për mirëpritjen tuaj bujare dhe me zemër të hapur të afganëve dhe mbështesim fuqishëm integrimin tuaj të plotë në komunitetin euroatlantik, veçanërisht përmes përparimit në reformat e sundimit të ligjit dhe drejt anëtarësimit në Bashkimin Evropian. Zgjedhja e fundit e Shqipërisë në Këshillin e OKB-së për të Drejtat e Njeriut është një shenjë respekti ndërkombëtar për përparimin e fuqishëm që ka bërë kombi juaj në dekadat e fundit dhe një njohje e shërbimit të tij shembullor në 2015-2017. Ne jemi krenarë që shërbejmë përkrah Shqipërisë dhe presim me padurim të punojmë së bashku për të promovuar dhe mbrojtur të drejtat e njeriut në mbarë botën”, thuhet tutje.
Njëherit, ai ka thënë se lidhjet midis dy kombeve, të bazuara në vlerat, kulturën dhe miqësinë e përbashkët, mbeten të qëndrueshme.
“Le të vazhdojë të përparojë puna jonë së bashku”, ka përfunduar Blinken./teve1.info/.
