Sekretari amerikan i Shtetit, Antony Blinken i ka thënë Këshillit të Sigurimit të OKB-së se do të punojë me ministrin e jashtëm të Kinës, Wang Yi, për të siguruar që lufta Izrael-Gaza të mos përshkallëzohet në një konflikt më të gjerë.
“Anëtarët e këtij këshilli, dhe anëtarët e përhershëm në veçanti, kanë një përgjegjësi të veçantë për të parandaluar përhapjen e këtij konflikti,” tha Blinken, duke shtuar se ai mezi pret “të vazhdojë të punojë me homologun tim nga Republika Popullore e Kinës për të bërë saktësisht atë”.
Wang është planifikuar të vizitojë SHBA-në të enjten. Edhe pse qëllimi i vizitës së tij është të krijojë terrenin për një udhëtim zyrtar të udhëheqësit të Kinës Xi Jinping muajin e ardhshëm, kriza në Lindjen e Mesme pritet gjerësisht të jetë në rendin e ditës, raporton BBC.
I dërguari i posaçëm i Kinës për Lindjen e Mesme, Zhai Jun, ka vizituar tashmë disa vende në Lindjen e Mesme me synimin për të ndërmjetësuar një armëpushim.
Ndikimi në rritje i Kinës në rajon ishte i dukshëm në fillim të këtij viti kur ajo ndërmjetësoi një marrëveshje midis Iranit dhe Arabisë Saudite – rivalët ranë dakord të rivendosin lidhjet dhe mbajtën bisedimet e tyre të para zyrtare që nga viti 2016.
