Kosova ka bërë kërkesë që të blejë 246 raketa Javelin në vlerë prej 75 milionë dollarësh. Për një hap të tillë ambasadori amerikan në Serbi, Christopher Hill sot e ka informuar edhe Aleksander Vuçiqin në takim.
Këtë veprim të Hill e ka komentuar politikologu, Dritëro Arifi duke theksuar që ShBA-ja e ka informuar Serbinë se e ka partner Kosovën.
Arifi ka thënë në emisionin “Këndi i Debatit” në Tëvë1 se Amerika nuk i shet armë çfarëdo shteti.
“Arsyeja është shumë e qartë. Hill e ka informuar Serbinë se Kosova është partner i SHBA-ve. Nuk ka më diplomaci se me tregu, se kur flet për Kosovën dije se për kë po flet. SHBA nuk i shet armatim çfarëdo vendi. Kur po flasim për diplomacinë amerikane ajo e ka mbyll shumë mirë punën por ne nuk e kemi kuptuar. Nuk është mirë më përmend që po blihet shumë. Një vend i vogël nuk ka nevojë më fol. Nuk është me rëndësi sa blen por me kry punë. Ne dy raketa mi ble i flasim”, ka thënë ai.
Ndërsa ministri i Mbrojtjes, Ejup Maqedonci, e ka konfirmuar më herët për Tëvë1 se kanë filluar procedurat për blerjen e raketave antitank “Javelin” për Kosovë. Përmes një deklarate të shkurtër, Maqedonci ka thënë se ky vendim është në kuadër të planit të tranzicionit të Forcës së Sigurisë së Kosovës në ushtri.
Një gjë të tillë e ka konfirmuar edhe Departamenti amerikan i Shtetit duke njoftuar se Kosova ka bërë kërkesë që të blejë 246 raketa Javelin në vlerë prej 75 milionë dollarësh. DASH-i tha se më 11 janar administrata amerikane ka njoftuar Kongresin për propozimin e programit për Shitjet e Huaja Ushtarake (FMS) për rastin e shitjes së raketave Javelin dhe pajisjeve të tjera të lidhura me to për Kosovën.
