Një baner i madh me fotografinë e personalitetit historik, Tony Blair u vendos në objektin e Kuvendit të Kosovës.
Për të u shtrua edhe tepihu i kuq që erdhi garda kombëtare e Forcës së Sigurisë së Kosovës.
E kryeministri britanik i cili luajti rol kyç në çlirimin e Kosovës nga okupatori serb, doli ta pres vetë presidentja e vendit, Vjosa Osmani.
E para e shtetit e quajti hero të Kosovës ish-kryeministrin e Britanisë së Madhe, derisa vlerësoi rolin e tij për ta shpëtuar popullin e Kosovës nga regjimi gjenocidal i Millosheviqit.
Shefja e shtetit, i dhuroi atij një gur të Trepçës nga familja e presidenti Rugova.
“Sot jeni hero i paqes për vendimin e drejtë të asaj kohe dhe të gjithë përkrahjen që ia keni dhënë Kosovës gjatë këtyre 25 viteve. Në prill të vitit 1999 e keni cilësuar intervenimin në Kosovë si një kauzë të drejtë, e tillë ishte siç u dëshmua atëherë dhe siç dëshmohet edhe sot. Në pyetje ishte vet ekzistenca e një populli. Me forcat aleate të NATO-s ju na shpëtuat nga shfarosja që synohej nga regjimi gjenocidal i Millosheviqit”, u shpreh Osmani.
Kurse, ish-lideri i partisë Laburiste, Tony Blair, tha se intervenimi i NATO-s në Kosovë ka qenë gjëja e duhur që është bërë.
Ai tutje tha se Kosova është e pavarur dhe e ka vendin në mekanizmat ndërkombëtar.
“Atëherë isha i bindur se intervenim i NATO-sishte gjëja e duhur për ta bërë dhe vazhdoj të jem i bindur. Gjithashtu, tani jam i bindur se duhet t’u rrimë krah njerëzve të Kosovës në mënyrë që e ardhmja e Kosovës të jetë në linjë me meritat e njerëzve të saj. Këtu po ndodhin shumë gjëra pozitive që janë mësim për tërë botën jo vetëm për popullin e Kosovës. Pres me padurim që ta pres ditën kur Kosova si komb i pavarur dhe sovran zë vendin e duhur në familjen e kombeve”, tha Blair.
Blair më pas zhvilloi takim edhe me kryeparlamentarin Glauk Konjufca si dhe me kryeministrin e vendit, Albin Kurtin.
Kurti u shpreh falënderues ndaj Britanisë së Madhe dhe ish-kryeministrit Blair për ndihmën dhe kontributin në çlirimin e Kosovës.
Blairin e mirëpriti në takim edhe kryetari i Prishtinës, Përparim Rama, i cili e nderoi me diplomatin britanik me çmimin “Qytetar Nderi” i Prishtinës.
