Prokuroria Themelore në Prizren ka zhvilluar sot një aksion të gjerë hetimor në bashkëpunim me Policinë e Kosovës, ku rreth 300 zyrtarë policorë kanë marrë pjesë në bastisje dhe veprime hetimore në disa lokacione.
Në kuadër të këtij aksioni janë arrestuar ish-drejtori i Byrosë Kosovare të Sigurimeve (BKS), Sami Mazreku, si dhe ish-drejtori i Financave në këtë institucion, Valon Berisha.
Pas zhvillimeve të sotme, një njoftim zyrtar ka lëshuar edhe vetë Byroja Kosovare e Sigurimeve, e cila ka bërë të ditur se rasti është iniciuar nga BKS-ja, në cilësinë e palës së dëmtuar.
“Rasti i sotëm, i cili po trajtohet nga Prokuroria Themelore në Prizren dhe për të cilin janë raportuar bastisje dhe veprime hetimore, është iniciuar nga vetë Byroja Kosovare e Sigurimeve, si rezultat i konstatimeve të identifikuara në raportin e Auditimit të Brendshëm”, thuhet në njoftimin e BKS-së.
Sipas Byrosë, pas evidentimit të shkeljeve serioze dhe dyshimeve për keqpërdorime, janë ndërmarrë veprime të menjëhershme ligjore.
“Në kuadër të angazhimit tonë për transparencë, integritet institucional dhe mbrojtje të interesit publik, Byroja Kosovare e Sigurimeve ka adresuar gjetjet përkatëse tek organet kompetente të rendit dhe drejtësisë, duke bashkëpunuar plotësisht me Prokurorinë dhe Policinë e Kosovës dhe duke vënë në dispozicion të gjithë dokumentacionin e nevojshëm për zhvillimin e hetimeve”, theksohet më tej.
BKS ka shtuar se mbetet e përkushtuar në forcimin e mekanizmave të kontrollit të brendshëm, parandalimin e keqpërdorimeve dhe menaxhimin e përgjegjshëm të mjeteve financiare, në përputhje me legjislacionin në fuqi.
“Byroja Kosovare e Sigurimeve respekton parimin e prezumimit të pafajësisë dhe beson se organet e drejtësisë do ta zbardhin plotësisht këtë rast, duke vepruar në përputhje me ligjin. Për çdo zhvillim të mëtejmë, opinioni publik do të njoftohet në kohë përmes kanaleve zyrtare”, thuhet në njoftim, ku shprehet edhe falënderim për Prokurorinë dhe Policinë e Kosovës për bashkëpunimin institucional.
Sipas burimeve Tëvë1, aksioni lidhet me dyshime për kryerjen e disa veprave penale, përfshirë: “keqpërdorim i besimit”, “keqpërdorim i autorizimeve në ekonomi”, “ndihmë në keqpërdorim të besimit” dhe “falsifikim i dokumenteve”.
Në këtë rast dyshohet se janë të përfshirë 35 persona, ndërsa dëmi financiar i pretenduar ndaj buxhetit të Byrosë Kosovare të Sigurimeve kap vlerën mbi 1 milion euro.
