Në prill të vitit 2024 hyri në fuqi Ligji për Trafikun Rrugor me disa ndryshime.Por një vit pas, filloi implementimi i disa neneve të këtij Ligji, që kap kryesisht bizneset.
Këto të fundit, nuk po mund të regjistrojnë veturat e tyre pa paguar gjobat që u shqiptohen punëtorëve të saj.Kjo po shihet si e pa pranueshme nga përfaqësues të tyre.
Nga Dhoma e Tregtisë dhe Industrisë vlerësojnë se vendimi është arbitrar dhe se kanë marrë ankesa të shumta nga kompani të ndryshme.
“Nuk mundet biznesi pavarësisht që e ka nën pronësi të veten automjetin të marrë përgjegjësitë e shoferit, shoferi mund të bëjë gabim shoferi mund të bëjë pagesën e jo në këtë rast biznesi. Tjetra që është më e çuditshme është se ne nuk kemi qenë fare të përfshirë as kur është bërë ky ndryshim e as bizneset fare nga komunikimet që kemi pasur qysh prej 10 ditë dy javësh afërsisht që jemi në komunikim të vazhdueshëm sa i përket kësaj situate tashmë të krijuar”, ka thënë Kreshnik Ahmeti.
Sipas Ahmetit, kjo ndikon në aktivitetin ekonomik të bizneseve, derisa shton se do t’i drejtohen edhe instancave tjera për këtë vendim.
“Unë pres shumë dhe ne do t’i kërkojmë edhe Avokatit të Popullit një reagim për këtë çështje sepse në të njëjtat forma është tentuar para një kohe që të detyroheshin qytetarët që si formë dënimi që fillimisht do të paguajnë të gjitha taksat ose tatimet komunale, para se ta bëjnë regjistrimin e automjetit dhe më pas vetë Gjykata Kushtetuese e shfuqizoi një vendim të tillë të cilin e quajti e konsideroi anti-kushtetues”, ka thënë tutje Ahmeti.
Por ky vendim po mirëpritet nga njohësi i komunikacionit, Bekim Ahmeti.
Ai tregon se në cilat raste aplikohet pagesa nga biznesi për gjobat në trafik.
“Kur kemi ne automobilin kur e lëmë keq diku e lëmë në parking të parregullt ajo mundet me i shku edhe kompanisë në këtë rast me u dënu në emër të kujt është i regjistruar automjeti, kurse në qoftë se jemi drejtpërdrejt ku ne e kemi thyer rregullin e kufizimit të shpejtësisë kur ne e kemi shkelë kufizimin e shpejtësisë më shumë se normal atëherë kjo i vjen individit ku i konfiskohet patent-shoferi ose zbritje e pikëve e kështu me radhë”, ka thënë Bekim Ahmeti.
Tëvë1 ka pyetur Ministrinë e Punëve të Brendshme rreth këtyre ankesave, por që nuk ka pasur një përgjigje.
Sipas nenit 89, paragrafit 4 pronari i mjetit nuk mund ta bëjë regjistrimin apo vazhdimin e regjistrimit të mjetit, apo ndërrimin e pronarit, pa e bërë shlyerjen e gjobave për kundërvajtje në trafikun rrugor.
