Kanë kaluar vetëm 10 ditë që kur edhe është hapur në sheshet e Prishtinës tregu “Verë n’dimër”. Por bizneset nuk po lëshojnë kuponë fiskalë e ATK ka nisur javën duke gjobitur këto biznese.
Java nuk nisi mirë për bizneset që janë vendosur në sheshet e Prishtinës.
Hiq më larg se këtë të hënë, këto biznese u gjobitën nga Administrata Tatimore e Kosovës pasi nuk po lëshojnë kuponë fiskalë.
Nga ATK treguan se të hënën, inspektorët kanë gjobitur pothuajse të gjitha bizneset, por nuk dhanë detaje.
“Po gjithsesi që ka inspektime, sepse secili biznes pavarësisht ku zgjedh me operu, në këtë rast në ‘Verë n’Dimër’ duhet të lëshojnë kuponë fiskal pas çdo shitje”.
Pavarësisht ankesave, organizimi i tregut dimëror “Verë n’Dimër” po mbledh qindra qytetarë çdo ditë.
E sipas tyre, ligji duhet respektuar.
“Ligji është ligj duhet mu respektu sipas ligjit jo vetëm kjo por çdo kund nuk është kjo dukuri vetëm te këta por kudo që shkon shumicën e rasteve nuk ka kuponë fiskal”, ka thënë qytetari, Muhedin Haxhiu.
“Jo ato duhet me i leshu qysh jo për atë është ata i kanë marrë paret e duhet me i leshu kuponët fiskalë”, ka deklaruar qytetari, Mahmut Pajaziti.
E dikush tjetër këtë po e sheh si një problem të vogël.
“Mendoj që ATK-ja nëse ka vërejtje i ka inspektorat e vet dhe mundet me vepru dhe mendoj që këto janë probleme shumë të imta të Komunës së Prishtinës në krahasim me çfarë probleme tjera ne ndeshemi”, ka deklaruar qytetari, Atdhe Arifi.
E në lidhje me këtë, nga Komuna e Prishtinës thonë se kjo çështje është nën kompetenca të ATK-së.
Por për të parë së afërmi gjithë atmosferën në këtë organizim të Komunës, në terren kishte dalë drejtori i shërbimeve publike, Bekim Brestovci.
“Jemi në inspektim të krejt situatës çfarë po ndodh së pari edhe për të inspektuar që a kemi zhurëm të tepruar sepse ka qenë kërkesë e jona e cekur në pëlqimin që e kemi dhënë që të mos ketë muzika individuale por që ato të jenë të shpërndara të dirigjuara prej njësisë qendrore të muzikës kështu që në këtë aspekt është duke shkuar çdo gjë në rregull”, ka thënë ai.
Këtë vit janë ndërtuar 120 shtëpiza të reja me çmim prej 3,900 euro plus TVSH.
