Pas dy muajve, bizneset të cilët kanë dal në treg të lirë të energjisë kanë filluar ti pranojnë faturat me çmime jo të rregulluara.
Por këto fatura sipas bizneseve, janë trefishë më të larta se ato të muajit qershor të vitit 2024.
Kështu të paktën deklaroi biznesmeni, Ramiz Kelemendi, cili të enjten mori faturën e muajit të kaluar por jo edhe atë të korrikut.
“Vitin e kaluar ka qenë fatura 166 mijë euro, nëse këtë vit, muajin qershor i vitit 2025 është 346 mijë euro. Këto para rreth 200 mijë janë shtesë, kanë me i dal të gjithë qytetarëve mbi barrën e çminimeve që kanë me u kriju”, thotë ai.
Nga data 31 korrik madje ishte paralajmëruar që kompanitë që nuk lidhin kontratë më furnizues afatgjatë do të iu shkëputët energjia elektrike.
Por gjatë ditës nuk u raportua një gjë e tillë.
“Deri në këto momente që po flasim nuk kemi ndonjë raportim për bizneset që janë shkyç nga energjia elektrike. Por kemi raportime të para për fatura të energjisë elektrike, edhe po flasim vetëm për faturat e muajit qershor jo edhe të korrikut. E kjo e qershor e tregon saktë atë që e kemi thënë që do të ketë nëse jo dyfishim por edhe trefishim të çmimit të energjisë në krahasim me qershorin e kaluar dhe këtij viti është gati tre fish çmimi i energjisë me shtrenjtë”, shprehet Kushtrim Ahmeti nga Dhoma e Tregtisë dhe Industrisë.
Megjithatë nga Dhoma e Tregtisë kanë paralajmëruar pasoja të shumta për bizneset të cilat do të paguajnë faturat me çmime jo të rregulluara.
“Bizneset kanë me qenë para një akti të kryer as nuk do të mund të mbajnë punëtorët se është në rrezik të madh e as nuk ka mundësi të rrit çmimin e produktit të vet sepse nuk është konkurrues karshi produkteve që vijnë nga jaht, sidomos nga Serbia, pasi shteti i vet vazhdimisht i subvencionon”, thotë ai.
Zyra e Rregullatorit të Energjisë ka licencuar 23 kompani për furnizim me energjisë. Por sipas Odave Ekonomike shumica e tyre nuk janë ofertues serioz.
