Sipas një komunikate për medie të Qeverisë, Bislimi këto deklarime i bëri gjatë vizitës treditore në Bruksel, ku u takua me zëvendëspresidenten për Vlera dhe Transparencë në Komisionin Evropian, Vera Jourova dhe me Drejtoren Menaxhuese për Evropë në EEAS, Angelina Eichhorst.
“Vendi ynë, ka përafruar politikën e saj të jashtme në linjë me Bashkimin Evropian. Pas aplikimit për anëtarësim në Këshillin e Evropës dhe hapave përpara drejt liberalizimit të vizave, elementi përbërës kryesor për ta përmbyllur këtë vit të suksesshëm është aplikimi për anëtarësim në BE.
Ballkani Perëndimor është i rëndësishëm për Bashkimin Evropian, andaj përshpejtimi i integrimit të rajonit, duhet të jetë i bazuar në meritokraci. Emëruesi i përbashkët, që unifikon hapat e shpejtë dhe meritokracinë, është demokracia. Një demokraci aktive dhe vibruese, e Kosova, përfaqëson këtë variabël e vlera të orientimit dhe qëndrimit të saj”, ka thënë Bislimi.
Zëvendëskryeministri Bislimi tha se ky është një hap i natyrshëm dhe se Kosova është gati për aplikimin për anëtarësim dhe kalimin mëtej në fazat e ardhshme.
“Ndërkohë, në takimin me znj. Eichhorst, zëvendëskryeministri Bislimi ritheksoi se vendimi për aplikimin për anëtarësim ishte lajmëruar që vitin e kaluar dhe tani është momenti për të formalizuar dhe dorëzuar aplikimin. Raporti për Vendin i cili është i pari që përfshin në plotni raportimin mbi Qeverinë Kurti, tregoi se Kosova është tashmë në një trajektore të re të zhvillimit”, thuhet ndër të tjera në komunikatë.
