Zëvendëskryeministri i Kosovës, Besnik Bislimi është takuar me përfaqësuesit e Misionit të Fondit Momentar Ndërkombëtar, që udhëhiqet nga Gabriel Di Bella.
Në këtë takim është diskutuar rreth punës dhe analizave të misionit në lidhje me Kosovën dhe bashkëpunimin e mbështetjen e FMN-së ndaj Qeverisë së Kosovës.
“Misioni vlerësoi pozitivisht qasjen dhe strategjitë e Qeverisë në përballimin e krizave të shumëfishta, formalizimin e aktiviteteve të ekonomisë dhe krijimin e një vizioni për të ardhmen prosperuese të vendit”, thuhet në komunikatë.
Sipas Zyrës së Kryeministrit, Kosova në raportin e fundit të FMN-së është vlerësuar pozitivisht me rritjen dhe performancën më të mirë nga vendet e Ballkanit Perëndimor.
Palët në këtë takim kanë diskutuar edhe mbi mungesën e stabilitetit në tregun energjetik ndërkombëtar dhe efektet e saj në Evropë dhe rajon.
“Duke i falënderuar dhe vlerësuar për bashkëpunimin përmes projekteve dhe mbështetjes së tyre, zëvendëskryeministri Bislimi theksoi se mirëpret përkrahje të mëtejme nga Fondi Monetar Ndërkombëtar për të tejkaluar sfidat e përbashkëta me të cilat përballet Kosova, rajoni dhe Evropa”, thuhet në komunikatë.
