Zëvendëskryeministri, Besnik Bislimi thotë se Serbia po vazhdon pengimin e procesit të dialogut, duke shkelur parimet dhe frymën e marrëveshjeve, së fundmi, “përmes projektligjit për përndjekje të paraqitur dje nga qeveria e tyre”.
Bilsimi në “X” ka shkruar se Serbia po dërgon letra në Komisionin Evropian për të zbatuar detyrimet nga dialogu vetëm që të përfitojnë miliona euro nga BE-ja dhe Plani i Rritjes.
“Serbia nga njëra anë dërgon letra angazhimi ndaj Komisionit Evropian ku shpreh vullnetin për të zbatuar detyrimet që rrjedhin nga procesi i dialogut, vetëm që të marrin miliona euro nga BE-ja dhe Plani i Rritjes, nga ana tjetër vazhdojnë të shkelin marrëveshjet, integritetin territorial dhe sovranitetin e Kosovës, dhe të bëjnë çdo përpjekje për të vazhduar bllokimin e rrugës përpara në procesin e normalizimit”, ka shkruar ai.
Ai tha se konstruktiviteti i rremë i Serbisë po vazhdon të ekspozohet përmes lëvizjeve në terren.
“Përmes lëvizjeve në terren të vetë Serbisë, duke përfshirë nxitjen e përshkallëzimeve në 3 vitet e fundit, sulmin në Banjskë, sulmet kundër institucioneve tona, inkursionin në territorin tonë dhe rrëmbimin e policëve, barrikadat në veri, fluturimin e MIG-ave pranë kufirit tonë, vendosjen e ushtrisë në gatishmëri të lartë dhe tash edhe me projektligjin për përndjekje të paraqitur dje, konstruktiviteti i tyre i rremë vazhdon të ekspozohet”, ka shkruar mes tjerash Bislimi.
Zëvendëskryeministri thotë se BE-ja si ndërmjetësuese duhet të përgjigjet dhe të reagojë pas vendimeve të fundit të Serbisë që lidhen me Kosovën.
“Cili është perceptimi i BE-së për fytyrën e vërtetë të Serbisë? A është ajo që në mënyrë të pabesueshme përpiqet të shfaqet si “konstruktiv” duke deklaruar përkushtimin ndaj procesit, apo ajo që miraton ligje të tilla dhe shkel vazhdimisht marrëveshjet dhe cenon integritetin territorial dhe sovranitetin tonë? BE-ja si ndërmjetës duhet të përgjigjet dhe të reagojë në mënyrë të vendosur”.
Qeveria e Serbisë njoftoi sot se e ka miratuar një projektligj për siç e quajti ajo organizimin dhe kompetencën e autoriteteve gjyqësore serbe në ndjekjen e veprave penale të kryera në territorin e Kosovës.
