Në ditën e dytë të qëndrimit në Athinë, zëvendëskryeministri, Besnik Bislimi, mori pjesë në panelin e diskutimit “Ballkani Perëndimor dhe Zgjerimi i BE-së 2030- Ëndërr apo Realitet?”, së bashku me homologë nga rajoni e po ashtu dhe përfaqësues nga Sllovenia, Sekretari i Shtetit për çështje Evropiane, Marko Stucin dhe zëvendësministrja e Punëve të Jashtme e Greqisë, Alexandra Papadopolou.
Gjatë fjalimit të tij, ai ka përmendur rëndësinë e liberalizimit të vizave, ku tha se Kosova tashmë vijon punën drejt Bashkimit Evropian.
“Më pas, i pyetur se sa është reale mundësia e anëtarësimit në BE deri në vitin 2030, zëvendëskryeministri theksoi se duhet të ketë një proces të standardizuar të vlerësimit për të gjithë rajonin, në lidhje me zbatimin e reformave dhe rrugën përpara drejt BE-së”, thuhet në njoftimin e Zyrës së Kryeministrit.
Bislimi ndër tjerash ka thënë se Kosova mbetet e përkushtuar në zbatimin e reformave dhe arritjen e standardeve evropiane.
“Në rastin e Kosovës, sfidat që shfaqen janë më shumë të jashtme sesa që burojnë nga brenda vendit, ai nënvizoi se vendi ynë vijon të mbetet i përkushtuar në zbatimin e reformave dhe arritjen e standardeve evropiane”./teve1.info/
