Zëvendëskryeministri, Besnik Bislimi, gjatë qëndrimit të tij në Athinë, ishte i ftuar në Kolegjin e New York-ut, ku ligjëroi dhe bashkëbisedoi me studentë, diplomatë e ambasadorë.
Përmes një komunikate, bëhet e ditur se gjatë fjalës së tij hyrëse, Bislimi ka folur për situatën ekonomike në Kosovë, hapat e politikat e ndërmarra nga Qeveria.
Po ashtu, ai ka thënë se në tre vitet e fundit në Kosovë, është rritur shkalla e punësimit.
“Gjatë fjalës së tij hyrëse, zëvendëskryeministri foli për situatën ekonomike në vend, hapat e politikat e ndërmarra nga qeveria, si dhe rrugëtimin tonë drejt integrimit evropian. Ndër të tjera ai përmendi shkallën e rritjes së punësimit në tre vitet e fundit, iniciativat tona si platforma Superpuna, formalizimi i ekonomisë, indikatorët makro ekonomikë pozitivë, si dhe nënvizoi se e gjitha kjo rritje ka ardhur përtej barrierave me të cilat është përballur vendi. Më tej, ai theksoi se është e rëndësishme të sigurohemi që kjo rritje ekonomike të jetë e qëndrueshme dhe gjithëpërfshirëse. Përmendi arritjen e liberalizimit të vizave dhe aplikimin për anëtarësim në Bashkimin Evropian në dhjetor 2022, pak pas marrjes së Raportit për Vendin, që në atë vit rezultoi të ishte më i miri ndonjëherë për Kosovën, dhe me progres të shënuar në zbatimin e reformave”, thuhet në komunikatë.
Pas fjalës së tij, thuhet se Bislimi u angazhua në diskutime me pjesëmarrësit dhe pyetjet e adresuara nga studentët e përfaqësuesit diplomatikë, mbi çështje si investimet e huaja në vend, sektorët prioritarë për investim, por edhe rrugën drejt Bashkimit Evropian dhe procesin e dialogut./teve1.info/.
