Zëvendëskryeministri i Kosovës, Besnik Bislimi, ka thënë se veprimi i djeshëm për mbylljen e degëve të Postës së Serbisë në veri të Kosovës është në shërbim të mbrojtës së ligjit dhe konkurrencës.
Ai ka thënë se këto degë të kësaj poste kanë vepruar ilegalisht në Kosovë dhe se veprime të tilla dhe strukturat paralele nuk kanë vend në Kosovë.
“Posta e Serbisë ka vepruar ilegalisht në territorin e Republikës së Kosovës. Veprimet e ndërmarra ditën e djeshme nga Policia, janë vetëm në shërbim të mbrojtjes së sundimit të ligjit, konkurrueshmerisë, dhe kushtetutshmërisë në vend. Strukturat paralele dhe aktiviteti ilegal, nuk kanë vend në Republikën e Kosovës. Kjo, do të duhej të mbështetej fuqishëm edhe nga partnerët e aleatët tanë ndërkombëtarë”, ka shkruar Bislimi.
Ai ka thënë se veprimi ilegal i kësaj poste nuk arsyetohet edhe pse është konsideruar si diskutim për të ardhmen në marrëveshjet e vitit 2013 dhe 2015.
“Prezenca e këtyre zyrave në territorin e Republikës së Kosovës përveçse paraqet shkelje të rëndë të parimeve të fqinjësisë së mirë, ato gjithashtu përbëjnë aktivitet ilegal, shkaktojnë çrregullim tregu, dhe prishjen e konkurrencës.Fakti që çështja e shërbimeve postare është konsideruar si diskutim për të ardhmen në marrëveshjet e kaluara të viteve 2013 dhe 2015, nuk nënkupton që në ndërkohë Posta e Serbisë të vijojë operimin ilegal në vend, të shkelë të gjitha rregullat, ligjet dhe Kushtetutën e Republikës së Kosovës. Asgjë nuk nënkupton të drejta, apo tolerim të entiteve ilegale në vend. Kjo assesi nuk mund të jetë e pranueshme dhe e lejueshme për shtetin tonë, e parimisht nuk do të duhej të ishte e pranueshme as nga ana e Bashkimit Evropian”, ka shkruar Bislimi në Facebook pas reagimeve të BE-së dhe ShBA-së për aksionin e së hënës.
Për aksionin djeshëm të ARKEP dhe Policisë së Kosovës ku u mbyllën nëntë degë të Postës së Serbisë në Kosovë, kanë reaguar edhe Bashkimi Evropian dhe Shtetet e Bashkuara të Amerikës.
Ato kanë shprehur zhgënjimin me këtë veprim duke thënë se ishte i njëanshëm dhe i pakoordinuar./teve1.info/
