E mërkura pritet t’i vë sërish përballë njërit tjetrit, kryenegociatorin e Kosovës, Besnik Bislimi dhe atë serb, Petar Petkovic.
Këtë takim e kanë konfirmuar edhe nga Bashkimi Evropian, ku përmes një postimi në Twitter, zëdhënësi i BE-së Peter Stano ka treguar edhe për temat e diskutimit.
“Nesër, emisari Miroslav Lajçak do të presë kryenegociatorët e të dyja palëve në kuadër të dialogut të lehtësuar në Bruksel. Fokusimi te zbatimit të plotë të Marrëveshjes së 27 Shkurtit dhe hapat drejt de-eskalimit të situatës në veri të Kosovës”, tha Stano.
Nga zyra e zëvendëskryeministrit, për tëvë1 kanë konfirmuar se Bislimi do të merr pjesë në këtë takim dhe se kryetema e diskutimit do të jetë, pika 4 e marrëveshjes për deeskalim që u arrit në Bratisllavë.
Në bazë të kësaj pike në takimin e së mërkurës kryenegociatorët do të finalizojnë marrëveshjen për rrugën e normalizimit pas së cilës do të fillojë zbatimi i të gjitha dispozitave të marrëveshjes.
Njohësja e çështjeve politike Donika Emini thotë se është e vështirë që kryenegociatorët të arrijnë një plan të sekuencimit.
Edhe njohësi i procesit të dialogut, Visar Xani thotë se takimi i së mërkurës, mund t’i hapë rrugën një takimi mes liderëve në nivelin e lartë politik.
Kosova dhe Serbia, përkundër dakordimit për pikat e marrëveshjes, nuk kishin arritur që në Ohër të dakordohen rreth një aneksi që përmban detajet e zbatimit dhe afatet kohore.
