Deputetja nga radhët e Partisë Socialiste në Shqipëri, Edona Bilali vlerëson se situata e krijuar sot në Kuvendin shqiptar “është për të ardhur keq”.
Seanca e cila u përcoll me sprej tymues, sipas Bilalit u bë për shkak të ish-kryeministrit Sali Berisha, pasi ky i fundit është nën hetime për dy vepra penale nga Struktura e Posaçme kundër korrupsionit dhe krimit të organizuar (SPAK).
“Çdo kush që e ka shkelur Ligjin, është e pamundur t’i fshihet drejtësisë. Ai do të përballet njësoj sikurse mund të përballen edhe kolegët nga krahu jonë nesër, pasnesër…në rastin e Berishës ai është shpallur nongrata për minim të demokracisë, ndërkohë që patjetër deputetët janë duke u përdorur për një kauzë personale…kjo situatë tashmë është krejtësisht e sistur nga një problematikë personale familjare e një individi që SHBA e ka shpallur nongrata, që luftën tashmë e ka me sistemin e drejtësisë. Dhe që kur SPAK-u, një strukturë tek e cila ne kemi investuar, filloi lëvizjet e para, kjo solli një reaksion zingjir me pretekste nga më absurd, sigurisht të palegjitimuara në Kushtetutë apo në rregulloren e Kuvendit, për me pa ato pamje që ju sapo transmetuat”, deklaroi ajo në një lidhje direkte në “Ditari” në Tëvë 1.
Gjatë seancës së sotme në Kuvendin e Shqipërisë, deputetët e opozitës bllokuan foltoren e Kuvendit duke vendosur karrige dhe më pas hodhën sprej tymues.
Ata po akuzojnë shumicën për refuzimin e ngritjes së disa komisioneve hetimore, me ç’rast Sali Berisha është shprehur se bllokimi i komisioneve dhe seancave parlamentare do të vijojë derisa të plotësohen kërkesat e opozitës. /Teve1.info/
