Grisja e librit të shenjtë të fesë islame, shkaktoi mllef në komunitetin myslimanë.
Personi me inicialet I.P, që nga marsi i këtij viti kur ndodhi rasti, është në paraburgim.
E ndaj tij, Prokuroria Speciale ka ngritur të martën një aktakuzë për “Nxitje të përçarjes dhe mosdurimit”.
“Sipas aktakuzës, i pandehuri, më 03.03.2025, në afërsi të Teqes “Saraçhane” në Prizren, ka nxitur dhe përhapur publikisht urrejtje dhe mosdurim midis grupeve fetare. Hetimet kanë rezultuar se I.P. e ka grisur dhe e ka shpërndarë në tokë librin e shenjtë të myslimanëve, Kuranin, duke shkaktuar mllef të madh te komuniteti islam dhe duke cenuar bashkëjetesën ndërmjet grupeve me ideologji të ndryshme fetare” , thuhet nga Prokuroria.
Për të pandehurin, Prokuroria ka kërkuar edhe trajtim të detyrueshëm psikiatrik.
“Prokurori i çështjes me rastin e ngritjes së aktakuzës i ka propozuar Gjykatës që i pandehuri të shpallet fajtor dhe t’i shqiptohet masa e trajtimit të detyrueshëm psikiatrik në liri, meqenëse aftësia e tij, në kohën e kryerjes së veprës penale, për të gjykuar dhe kontrolluar veprimet e veta ka qenë e zvogëluar në shkallë esenciale”, ka bërë të ditur Prokuroria.
E për përfaqësuesin ligjor të Bashkësisë Islame në Prizren, shpejtësia e trajtimit të kësaj lënde nga institucionet e drejtësisë, tregon për seriozitetin e çështjes.
Për BIK-un, si palë e dëmtuar, është e papranueshme kërkesa e prokurorisë për trajtim psikiatrik.
Përkundër që rasti ka ndodhur në Prizren, do të trajtohet në Departamentin Special të Gjykatës Themelore në Prishtinë.
