Rrjetet celulare kanë rënë në të gjithë territorin e Holandës, përderisa vendi po pret samitin e NATO-s i cili po mbahet në Hagë.
Problemi thuhet se buron nga sistemi i ofruesit të shërbimeve celulare Odido dhe disa prej degëve të tij partnere.
AP raporton se kompania ka konfirmuar se shumë prej klientëve të saj po përballen me ndërprerje të përhapura në komunikimet celulare, ndërkohë që teknicienët janë duke punuar për të identifikuar dhe zgjidhur shkakun e defektit.
Ndërkohë, Qendra Kombëtare Holandeze për Sigurinë Kibernetike (NCSC) ka bërë të ditur se aktualisht nuk është përfshirë në hetimin e incidentit.
Zëdhënësi i qendrës, Job Holzhauer, tha për mediat se përgjegjësia kryesore për hetimin bie mbi vetë ofruesin e shërbimit, Odido.
Ai shtoi se NCSC do të përfshihej vetëm në rast se hetimi zyrtar do të konfirmonte një sulm kibernetik si shkak i ndërprerjes.
“Qendra e sigurisë kibernetike është e gatshme të ndërhyjë nëse ka shenja të një akti keqdashës kibernetik, por për momentin nuk kemi asnjë indikacion të tillë,” tha Holzhauer.
