Agjencia e Menaxhimit Emergjent ka njoftuar se situata me zjarret në vend është përmirësuar ndjeshëm gjatë 12 orëve të fundit.
Siç bëhet e ditur në njoftim, aktualisht aktiv është vetëm një zjarr në fshatin Trudë në Komunën e Prishtinës, ku ekipet zjarrfikëse ndodhen në terren dhe po punojnë për shuarjen e tij.
Sipas AME-së, ndërhyrja e shpejtë e zjarrfikësve dhe ndihma nga reshjet e shiut kanë qenë vendimtare në vënien nën kontroll të situatës.
Agjencia ka bërë thirrje për kujdes të shtuar nga ana e qytetarëve dhe për shmangien e çdo veprimi që mund të shkaktojë zjarr, duke theksuar rëndësinë e raportimit të menjëhershëm të çdo rreziku te autoritetet përkatëse.
“U bëjmë thirrje të gjithë qytetarëve që të tregojnë kujdes të shtuar, të shmangin çdo veprim që mund të shkaktojë zjarr dhe të raportojnë menjëherë çdo vatër të dyshimtë tek autoritetet përkatëse. Agjencia falënderon zjarrfikësit për përkushtimin e tyre të palodhshëm, Policinë e Kosovës dhe KFOR-in për mbështetjen, si dhe qytetarët për bashkëpunimin”, thuhet në njoftim.
