Presidenti i SHBA Joe Biden konfirmoi lirimin e dy amerikanëve të mbajtur peng nga Hamasi për 14 ditë “të tmerrshme”, duke thënë se ai është “i gëzuar” që nëna dhe vajza “do të ribashkohen së shpejti me familjen e tyre”.
“Këta individë dhe familja e tyre do të kenë mbështetjen e plotë të qeverisë së Shteteve të Bashkuara dhe ne të gjithë duhet të respektojmë privatësinë e tyre në këtë moment”, tha Biden në një deklaratë të premten.
Biden përsëriti se administrata e tij ka qenë “duke punuar gjatë gjithë kohës” për të liruar amerikanët e mbajtur peng nga Hamasi dhe tha: “Ne nuk i kemi ndërprerë përpjekjet tona për të siguruar lirimin e atyre që janë ende të mbajtur”, raporton CNN.
Qeveritë e Katarit dhe Izraelit ishin partnerë në përpjekjet për lirim, tha presidenti.
“Jill dhe unë kemi mbajtur afër në zemrat tona të gjitha familjet e amerikanëve të pagjetur. Dhe, siç u thashë atyre familjeve kur fola me ta javën e kaluar – ne nuk do të ndalemi derisa t’i kthejmë të dashurit e tyre në shtëpi. Si president, nuk kam prioritet më të lartë se siguria e amerikanëve të mbajtur peng në mbarë botën”, tha Biden.
Amerikanët e liruar – një nënë dhe vajza e saj 17-vjeçare – janë nga Çikago dhe kishin qenë duke vizituar të afërmit në Nahal Oz, një komunitet bujqësor në Izraelin jugor, kur u morën, sipas familjes së tyre.
