Pjesëtarë të Agjencisë Serbe të Inteligjencës (BIA), në bashkëpunim me Ministrinë e Brendshme të Serbisë (MUP), kanë arrestuar mëngjesin e sotëm Sasha Gjorgjeviqin nga Shtërpca, në pikëkalimin kufitar Kosovë–Serbi në Merdar.
Arrestimi është kryer në një aksion të dokumentuar me kamera, i cili më pas është shpërndarë nga mediat serbe. Sipas mediumit “Kosovo Online”, Gjorgjeviq dyshohet se ka qenë bashkëpunëtor i Shërbimit Informativ të Shqipërisë, përmes Agjencisë së Kosovës për Inteligjencë (AKI).
Videoja e publikuar nga “Kosovo Online” tregon momentin e ndalimit të tij nga forcat serbe të sigurisë. Deri më tani, nuk janë dhënë detaje zyrtare nga autoritetet serbe për natyrën e veprimtarisë së dyshuar të Gjorgjeviqit, ndërsa nuk ka pasur reagim nga AKI apo institucionet e Kosovës.
