Ndonëse jo fizikisht, për herë të 32-të u mblodhën të mërkurën.
Kësisoj qeveria në detyrë, përmes mbledhjes elektronike, mori plot 24 vendime.
Mes tyre, edhe vendimet për emërim të komisioneve për pranim të kategorisë së lartë drejtuese për pozita nëpër ministri.
Por, këto vendime të qeverisë në detyrë, po konsiderohen të paligjshme.
Shkak për këtë sipas Vullnet Bugaqkut nga Instituti Demokratik i Kosovës, është fakti se shumica e kabinetit qeveritar tashmë janë betuar edhe si deputetë.
“Çfarëdo vendimi që është marrë mbrëmë dhe nëse në atë vendimmarrje kanë marrë pjesë këta persona të cilët mbajnë funksione të dyfishta, unë mendoj se e kanë shkelur ligjin, madje edhe vetë Ligjin për Qeverinë”, vlerëson ai.
E njëjtë mendon edhe Naim Jakaj nga Instituti i Kosovës për Drejtësi.
Madje ky thotë se vendimet e së mërkurës mbrëma duhet të shfuqizohen.
“Vendimet e djeshme të Qeverisë janë të kundërligjshme, rrjedhimisht ato do të duhej të shfuqizoheshin menjëherë për plot arsye. Një nga arsyet është se një pjesë e tyre janë betuar edhe si deputetë. Sipas Ligjit për Qeverinë, ata do të duhej të jepnin dorëheqje një ditë para certifikimit të rezultateve zgjedhore”, thotë ai.
Ndërkohë, ish-kryetari i Gjykatës së Apelit, Hasan Shala, tregon se çfarë ndodh me këto vendime nëse shpallen të jashtëligjshme.
“Këto vendime janë të kundërligjshme dhe në kundërshtim me vetë Ligjin për Qeverinë. Mirëpo, këto vendime nuk mund të shpallen automatikisht ‘nul’, por duhet të iniciohet procedura para gjykatës dhe sigurisht atëherë edhe gjykata do të përcaktojë se këto vendime janë në kundërshtim me ligjin”, shpjegon ai.
E këto vendime, po konsiderohet se mund të kenë edhe pasoja.
“Pasojat mund të jenë të shumëfishta. Mund të ketë pasoja kushtetuese në kuptimin e kontestimit të mandatit të këtyre zyrtarëve. E dyta, mund të jenë pasoja administrative, në kuptimin e asaj që mund të anulohen ato vendime në rast se atakohen në Gjykatën Administrative, dhe e treta, mund të prekin edhe elemente të përgjegjësisë penale”, shprehet Bugaqku.
Ndryshe, palët kanë të drejtë ankese brenda afatit prej 30 ditësh për shfuqizimin e këtyre vendimeve.
