Me radhë po hyjnë në Kuvend për seancën për të cilën u thirrën.
Me t’u futur brenda, po japin edhe nënshkrimet.
Anipse seanca konstituive ishte paraparë për në orën 10:00, ky orar si shpeshherë, nuk u respektua.
Gjersa pritej nisja e saj, disa deputetë patën kohë të bëjnë edhe fotografi.
Seancën nga afër e ndoqi edhe djali i Afrim Bunjakut, policit të vrarë në Banjskë të Zveçanit.
Rreth gjysmë orë pas, në sallë arriti edhe kryeministri në detyrë, Albin Kurti.
Një përshëndetje me kokë ua bëri deputetët opozitarë.
E pas tij, erdhën edhe Gluak Konjufca e Xhelal Sveçla.
Me t’u rahatuar të tre, seanca filloi.
Fjalën e mori deputeti më i vjetër Avni Dehari nga Lëvizja Vetëvendosje, që seancën e udhëhoqi bashkë me deputeten më të re, Fatma Taqi nga partia turke.
S’vonoi shumë e Dehari u bëri thirrje grupeve parlamentare që të propozojnë nga një deputet, anëtarë të Komisionit për verifikimin e mandateve.
“Subjektet në vijim përfaqësohen me nga një deputet të cilët do të jenë anëtarë të Komisionit”, tha kryesuesi i seancës.
Pas përfundimit të propozimeve, Dehari vendosi për një pauzë 30 minutëshe.
Megjithatë, kjo pauzë zgjati rreth një orë.
Më pas, lajmi u dha se gjithçka është në rregull dhe mund të procedohet tutje.
“Komisioni ka vlerësuar vlefshmërinë e mandateve të deputetëve sipas vendimit të Komisionit qendror të zgjedhjeve”, tha Dehari.
Tutje, sipas rendit të ditës, u bë edhe betimi i deputetëve.
Pas kësaj, fjalën e mori kryeministri në detyrë, Albin Kurti.
Teksa ai nisi të flasë për takimet me liderët e tjerë, u shoqërua me reagime të ashpra nga opozita.
Megjithatë, Kurti deklaroi se i duhet ende kohë për konsultime lidhur me çështjen e presidentit, për çka edhe kërkoi që seanca të shtyhet.
“Kërkojmë kohë shtesë që t’u japim shans bisedimeve politike për marrëveshje për president a presidente të re”, u shpreh Kurti.
Kësisoj, Dehari e ndërpreu seancën.
“Meqenëse nuk kemi emër nga subjekti më i madh, atëherë obligohem që ta ndërpres seancën. Për vazhdimin e seancës do të njoftoheni me kohë”, tha ai.
Afati për konstituimin e Kuvendit përfundon të premten në mesnatë.
