Deputeti i Lëvizjes Vetëvendosje, Besim Muzaqi, për kryetarët nga partitë politike shqiptare, të zgjedhur në katër komunat veriore në zgjedhjet e 23 prillit, thotë se do të jenë shërbëtorët më të mirë të qytetarëve të tyre.
Muzaqi, thotë se procesi i inaugurimit është një proces i bazuar në ligj dhe kushtetutë.
“Ata do të jenë shërbëtorët më të mirë të qytetarëve të tyre, procesi i inaugurimit, betimi i kryetarëve të komunave është një proces i bazuar në ligj dhe kushtetutë. Po fillojmë nesër me kryetarin e Komunës së Mitrovicës së Veriut, komunës veriore të Mitrovicës për të vazhduar pastaj me tre kryetarët e tjerë. Kemi edhe mbështetjen e miqve tanë të cilët kanë dhënë mesazhe, të cilat janë të qarta në aspektin diplomatik, por edhe në aspektin konkret”, tha ai në emisionin “Ditari” në Tëvë1.
Për seancën solemne për betimin e kryetarëve të rinj, e cila pritet të ndodhë nesër, deputeti thotë se si proces presin që të kalojë pa as më të voglin incident.
“Nuk duhet të ketë asnjë problem i cili do të mund të ju shkaktohej në zbatimin e ligjit dhe kushtetutshmërisë brenda Republikës. Si qeveri jemi të vendosur që të zbatojmë kushtetutën e vendit, si proces ne presim që të kalojë pa as më të voglin incident dhe të vazhdojmë tutje. Le të bëhet një procedurë e zakonshme, e cila i takon secilës qeveri komunale pas zgjedhjeve që mbahen atje”, shtoi ai.
Nesër, kryetarët e sapozgjedhur në katër komunat veriore me shumicë serbe në Mitrovicë të Veriut, Zubin Potok, Zveçan, dhe Leposaviq, do të duhej të bëjnë betimin si kryetar. Zgjedhjet e parakohshme lokale janë mbajtur më 23 prill, ku u bojkotuan nga Lista Serbe, si partia më e madhe me shumicë serbe. /teve1.info/
