Komandanti i UÇK-së në Koshare, Xhafer Gashi, i cili tashmë është kryetar i Komunës së Obiliqit, në 25-vjetorin e Betejës së Koshares, tha se gjatë periudhës së luftimeve kanë pasë komunikim edhe me kreun e AAK-së, Ramush Haradinaj si komandant i Zonës Operative të Dukagjinit.
Gashi tha se gjatë zhvillimit të betejës ka pasë raste kur ne kemi mbështetë me zjarr zonën e Dukagjinit.
“Në raste kemi pasë komunikim edhe me zotin Haradinaj, në raste. Po ka pasë gjatë zhvillimit të betejës ka pasë raste kur ne kemi mbështetë me zjarr zonën Dukagjini, në këtë rast zotin Haradinaj. Kemi pasë edhe altileri që ka përfshi deri në 20 km distancë dhe normal që ne as nuk e kemi pa ku kanë ra ato predha, mirëpo në koordinim me zotin Haradinaj është korigju zjarri në zonat në thellësi”, tha Gashi në emisionin “Këndi i Debatit” në Tëvë1.
Derisa i pyetur se sa ushtarë kishin këto dy Brigada, Gashi tha se fillimisht kanë qenë diku 270 ushtarë e më pas ka arritur deri në 3 mijë.
“Faktikisht kanë qenë shumë pak, në këto dy brigade dhe batalione diverzant vëshgues kemi qenë diku rreth 270 ushtarë. E që më pas ka arritë deri në përmbyllje deri në 3 mijë”, tha Gashi tutje.
Ndryshe, Beteja e Koshares më 9 prill 1999, një fitore e shquar për Ushtrinë Çlirimtare të Kosovës në kuadër të operacionit “Shigjeta”, shënoi thyerjen e kufirit mes Kosovës dhe Shqipërisë, hapjen e rrugës për furnizim me armatim dhe mbështetje logjistike, si dhe forcimin e besimit të popullsisë ndaj UÇK-së dhe aleatëve të saj./teve1.info./
