Profesori universitar, Dashamir Bërxulli ka kritikuar udhëheqësit e Lëvizjes Vetëvendosje dhe Lidhjes Demokratike për takime të rralla sa i përket çështjes së presidentit.
Ai ka shtruar pyetje se nëse dy partitë kanë qëllim një marrëveshje, pse nuk ka takime më të shpeshta.
Bërxulli ka thënë se kohëzgjatja e bisedimeve e vë në pozitë të vështirë Abdixhikun, i cili sipas tij ndien dobësi në bisedime dhe këtë e di Kurti.
“Nuk e kuptoj pse këta nuk takohen çdo ditë, në rast se duan ta bëjnë një gjë të tillë pse nuk takohen çdo ditë, për të zgjedhur president, pse marrin kohë, me ndjenjat e kujt po luajnë, mendimin e kujt po e kërkojnë. Pra kohëzgjatja e negociatave si një taktikë e fuqishme negociosue e z.Kurtit e vendos kundërshtarin në dobësitë dhe qartësisht ai ndiejnë dobësinë e z.Abdixhikut në tavolinën e bisedimeve”, ka thënë Bërxulli.
Ai poashtu ka kritikuar LDK-në që sipas tij merr pjesë në bisedime pa i vë si kërkesë Kurtit që fillimisht të konstituojë Kuvendin.
“Si është e mundur që z.Abdixhiku hyn në tavolinën e negociatave pa i thënë z.Kurti që po bimë dakord për presidentin po e zgjedhim konsensual, po t’i konstituo Kuvendin”, ka thënë Bërxulli.
Më 13 gusht kryetari i LDK-së, Lumir Abdixhiku njoftoi se kjo parti nuk do të kërkojë poste në qeveri me LVV-në e as postin e presidentit.
Por, ai shprehu gatishmëri për bisedime me LVV-në për një president konsensual.
Një takim për këtë çështje u zhvilluar të martën.
Kurti e Abdixhiku pas takimit dhanë sinjale pozitive, duke shtuar se për profilin e presidentit do të zhvillojnë diskutime brenda partive për tu takuar sërish.
