Profesori universitar Dashamir Bërxulli, në emisionin “Këndi i debatit” në Tëvë1, ka komentuar ngërçin politik në vend lidhur me moszgjedhjen e presidentit të Kosovës.
Ai tha se është e vështirë të vlerësohet nëse kryeministri Albin Kurti dëshiron realisht një president konsensual, duke shtuar se sipas tij, Kurti synon një president që i përshtatet qasjes së tij politike.
“Është vështirë ta dimë nëse z. Kurti do realisht president apo jo. Unë mendoj që ai do një president, por një president në formatin që do ai, jo çfarëdo presidenti – një president të vetin”, tha Bërxulli.
Ai theksoi se aktualisht Kurti ka kontrollin politik dhe strategjik në proces, ndërsa partitë e tjera, sipas tij, nuk po ofrojnë alternativa konkrete.
“Z. Kurti i ka kartat në dorë, siç e thotë edhe opozita. Ai është lideri kryesor në këtë proces, jo vetëm për numrat, por edhe për strategjinë deri te presidenti, sepse të tjerët nuk bëjnë propozime dhe vetëm artikulojnë qëndrimet e tyre”, u shpreh Bërxulli.
Sipas tij, mungesa e propozimeve nga partitë e tjera tregon se ato tashmë kanë hequr dorë nga iniciativa në këtë proces.
“Këta të tjerët nuk bëjnë propozime, sepse kanë hequr dorë dhe vetëm artikulojnë pozicionin e tyre”, tha ai.
Kujtojmë se vendi ndodhet në një situatë bllokade politike, me më pak se dy javë të mbetura nga afati kushtetues për zgjedhjen e presidentit.
