Kryeministrja e Serbisë, Ana Bërnabiq, tha sot se Serbia po e paguan çmimin për mos vendosjen e sanksioneve ndaj Rusisë, por gjithashtu shtoi se ky është qëndrim parimor dhe se nuk mendon se propozimi franko-gjerman për Kosovën do të kishte qenë ndryshe nëse Serbia do të kishte vendosur sanksione.
“Qëndrimi i Serbisë është parimor, ne do ta mbrojmë atë për aq kohë sa mund ta mbrojmë”, tha Bërnabiq për TV Prva.
Ajo shtoi se kishte kandidatë presidencialë që gjatë fushatës thanë se nuk do të vendosin sanksione ndaj Rusisë dhe se Vuçiqi do ta bënte, teksa pas zgjedhjeve thanë se Serbia është e papërgjegjshme sepse nuk po vendos sanksione, shkruan Tanjug, transmeton teve1.info.
Gjithashtu ajo theksoi se “para së gjithash është e rëndësishme të jesh i sinqertë me popullin dhe të mos gënjesh për të fituar një pikë politike, e më pas të ndryshohet politika”.