Pas arritjes së një ujdie mes Iranit dhe Izraelit, çmimi i naftës në tregjet ndërkombëtare ka shënuar rënie, ndikim ky që tashmë është reflektuar edhe në Kosovë.
Kryetari i Shoqatës së Naftëtarëve, Fadil Berjani, sot në Tëvë1 konfirmoi se çmimi në berzat ndërkombëtare ka rënë për 6-7 cent, gjë që ka sjellë edhe ulje të çmimeve në pikat e karburanteve në vend.
“Sa herë ka ulje në berz, ka gjithmonë ulje edhe në pikat e karburanteve nëpër Kosovë”, deklaroi Berjani.
Ai theksoi se vendimi i fundit i Ministrisë së Tregtisë për çmimet nuk ka ndikuar drejtpërdrejt në këtë zhvillim, por është tregu global ai që përcakton lëvizjet e çmimeve.
Sipas tij, qytetarët nuk duhet të alarmohen për rritjet e çmimeve, pasi ato kanë qenë pasojë e situatave të jashtëzakonshme në skenën ndërkombëtare.
“Vendimi për ngritjen e çmimit nuk ka qenë i ngutshëm, sepse ai atje është realitet. Lufta kur ka qenë në Ukrainë, e kemi pasur çmimin deri në 2 euro në Kosovë. A këtu lufta në Iran mes Izraelit ke 1.20 euro kanë qenë tre çmimoret e naftës. Kështu që nuk ka pasur nevojë të bëhet panik te qytetarët, sepse çmimet kanë qenë reale dhe janë ende”, tha ai në “Mesditë”.
Berjani gjithashtu theksoi se qytetarët e Kosovës aktualisht po furnizohen me çmimet më të ulëta të naftës në regjion.
“Qytetarët janë duke u shërbyer me çmimet më të lira në regjion. Në Serbi e Shqipëri çmimi është 1.90, në Bosnje 1,70 e gjithashtu edhe në Mal të Zi”, deklaroi ai.
Megjithatë, ai paralajmëron se stabiliteti i çmimeve është i varur nga situata globale: “Lufta është akoma duke u zhvilluar, dhe pa ndalimin e saj nuk mund të ketë stabilitet të çmimit të naftës”.
