Veton Berisha nga Partia Liberale Egjiptiane ka dhënë detaje se çfarë është diskutuar në takim me kryeministrin në detyrë, Albin Kurti.
Berisha në studion e emisionit “Ditari” renditi kërkesat që Partia Liberale Egjiptiane i ka karshi Kurtit për komunitetin egjiptian.
Ai në emër të partisë deklaroi se janë të gatshëm të marrin pjesë në një qeveri e cila do t’i respektojë kërkesat politike të komunitetit egjiptian.
“Veçse kanë filluar konsultimet e para, mandatari i krijimit të Qeverisë Kurti e ka shumicën e këtyre zgjedhjeve dhe normalisht i takon rundi i parë dhe tashmë ai ka filluar të na takojë për një mundësi bashkëpunimi mes nesh. Kemi pranuar ftesën dhe kemi pranuar për të shkuar, sepse jemi pjesë e Kuvendit të Kosovës dhe normalisht ne jemi të interesuar për të marrë pjesë në një qeveri nga e cila respektohemi si parti politike, komuniteti egjiptian dhe kërkesat politike të komunitetit egjiptian”, deklaroi ai në Tëvë1.
Gjatë takimit, Berisha potencoi se para Kurtit kanë dorëzuar një program, i cili është realizuar nga komuniteti egjiptian. Përveç programit, ai tha se kanë kërkuar edhe pozita të mjaftueshme për realizimin e tij.
“Nuk kemi hy në detaje të thella për kërkesa për shkak që është konsideruar si takim fillestar. Në parim ne e kemi siguruar Kurtin që ne s’kemi vija të kuqe dhe s’kemi probleme personale për të shkuar, apo për të mos shkuar. Për ne vota e qytetarit do të respektohet. Ia kemi bërë me dije Kurtit që ne jemi një komunitet, i cili ka nevojë për ndërhyrje të shtetit. I treguam që kemi një program, i cili është i nxjerrë nga vetë komuniteti, ia dorëzuam që deri në takimin tjetër do ta shoh nëse është i gatshëm për të implementuar atë program. Kemi kërkuar që të marrim edhe pozita të mjaftueshme, në mënyrë që ta ndihmojmë implementimin e këtij programi. Në këtë nivel ka mbet, por gjatë javës që vjen sigurisht do të kemi prapë takim të radhës. Në rast se jemi të gatshëm për bashkëpunim, presim që Kurti të reflektojë”, tha ai./teve1.info/
