Hisen Berisha, nga Partia Demokratike e Kosovës në emisionin “Mesditë” në Tëvë1, ka folur për qëndrimin e partisë së tij lidhur me votimin e kryeparlamentarit në Kuvendin e Kosovës.
Berisha tha se PDK nuk do të japë votën për asnjë kandidat që ka qenë pjesë e kabinetit qeveritar dhe që është penalizuar.
“Qëndrimi i Partisë Demokratike është i qartë: të gjithë ata që janë penalizu edhe kanë qenë pjesë e kabinetit, nuk do të votohen nga PDK-ja. Por kjo nuk do të thotë që në radhët e Kuvendit nuk do të ketë kandidatë që mund të marrin votën e PDK-së, sepse aty duhet të jenë të denjët për të përfaqësuar Kuvendin,” tha Berisha.
Ai shtoi se nesër Lëvizja Vetëvendosje do të propozon një kandidat të ri një femër, por opozita nuk do ta votojë.
“VV-ja nesër poashtu mund të vijë me një ofertë të re për një kandidat për kryetar të Kuvendit, por që nuk do të jetë i pranueshëm dhe as i votueshëm nga partitë opozitare, edhe sipas gjasave ajo do të jetë femër,” theksoi ai.
I pyetur për mundësinë që PDK të votojë nëse kandidatura do të ishte Mimoza Kusari-Lila, Berisha tha se kjo do të mbetet një çështje e vlerësimit të brendshëm.
“Është çështje e vlerësimit nga PDK-ja nëse vendosin apo jo. Së pari duhet të përmbushë kriteret e integritetit politik, pastaj njerëzor e moral,” u shpreh Berisha.
