Ish-deputeti i Partia Demokratike e Kosovës, Hisen Berisha, ka reaguar ashpër pasi një fotografi e ish-presidentit Hashim Thaçi u gjet në mbeturina në hapësirat e bodrumit të Ministria e Punëve të Jashtme dhe Diasporës në Prishtinë.
Duke folur në emisionin “Mesditë” në Tëvë1, Berisha tha se një veprim i tillë tregon mungesë të kulturës institucionale dhe administrative në institucionet shtetërore.
“Qenia e kësaj fotografie në atë gjendje tregon se ne nuk kemi protokoll administrativ shtetëror. Në zyrat shtetërore duhet të respektohen rregullat institucionale, ku figurat e presidentëve dhe personaliteteve që kanë udhëhequr shtetin trajtohen me dinjitet”, ka thënë Berisha.
Sipas tij, ky rast tregon mungesë të kulturës profesionale dhe shtetërore, si dhe mungesë kujdesi ndaj arkivave dhe dokumenteve që dëshmojnë historinë e institucioneve të Kosovës.
“Kjo tregon mungesë të kulturës profesionale, mungesë të kulturës shtetërore dhe të funksionimit administrativ, si dhe moskujdes për arkivat dhe dokumentacionet që dëshmojnë historinë dhe punën e institucioneve për ngritjen e shtetit që nga pavarësia”, u shpreh ai.
Berisha përmendi edhe ministren e Punëve të Jashtme, Donika Gërvalla-Schwarz, duke thënë se një situatë e tillë nuk është krejtësisht e papritur duke pasur parasysh qëndrimet e saj të mëhershme.
“Duhet njohur edhe figurën e Donika Gërvallës dhe qëndrimet që ajo ka pasur më herët, përfshirë edhe ato për mbështetjen ndaj të akuzuarve në Hagë. Të gjitha këto paragjykime mund ta kenë bërë këtë veprim edhe me qëllim”, ka deklaruar Berisha.
