Përmes një postimi në Facebook, Berisha ka kërkuar urgjent lirimin e ballistit Morina.
“Rama me urdhër te Beogradit arreston superfansin e kombëtares tonë, Ismail Morina. Kërkoj lirimin e tij urgjent. Të dashur miq, me urdhër të Edi Rames arrestohet sapo vuri këmbën në dheun e tij, Ismail Morina si hakmarrje për dronin që lëshoj me stadiumin e Beogradit me figurat e Ismail Qemalit dhe Isa Buletinit dhe që harboj fare ultranacionalistet serb me ne krye serbomadhin Vuçiq. Që nga ajo kohë, Ismail Morina është shndërruar në njeriun me të persekutuar në Ballkan. Rama dhe Vuçiq, përkatësisht shërbimet e tyre sekrete, kane montuar kundër Ballistit kurthe të ulta dhe kane sajuar akuza pa asnjë baze”, ka shkruar ai.
Berisha iu bën thirrje të gjitha organizatave ndërkombëtare të të drejtave të njeriut që të ndëryjnë në lirimin e menjëhershëm të Ismail Morinës.
“Dënoj me ashpërsinë me të madhe arrestimin e Morines dhe kërkoj lirimin e menjëherëshem të tij. Ju bëj thirrje të gjitha organizatave ndërkombëtare të të drejtave të njeriut të ndërhynë për lirimin e tij të menjëhershëm dhe të dënojnë persekutimin politik të Morines nga binomi famëkeq Rama-Vuçiq”, ka përfunduar Berisha.
Ismail Morina është autori i dronit me banderolën “AUTOCHTHONOUS” i cili më 14 tetor të vitit 2014 në ndeshjen Serbi – Shqipëri ka ngritur bandelorën mbi stadiumin e Beogradit. /teve1.info/
