Deputeti i PDK-së, Hisen Berisha ka vazhduar reagimet ndaj ministres së Drejtësisë, Albulena Haxhiu, pas deklaratës së kësaj të fundit në Kuvend, ku i është drejtuar opozitës me fjalët “ju i keni duart e lyme me gjak”, në rastin e ish-aktivistit, Astrit Dehari.
Përmes një postimi në Facebook, Berisha ka thënë se është i pakët fjalori i “vrasësve revolucionar”.
“Është normale një reagim me fyrje nga klani i vrasësve dhe shtytësve në vetëvrasje. Të vrasësh apo shtyesh në vrasje te dy djemtë Dehari, të ua zhdukësh mostrat nga laboratori i Mjekësisë Ligjore që është në kompetencë direkt të Ministrisë së Drejtësisë, e ta etiketosh me gjuhë fyese, njeriun/deputetin i cili të kërkon llogari në Kuvend për krimet monstruoze të natyrës revolucionare (vrasje për të ardhur në pushtet), është i pakët fjalori i ‘vrasësve revolucionar’ që u ka ardhë dita!”, ka shkruar ai.
Tutje, Berisha ka thënë se në rastin e parë që PDK-ja vie në pushtet, LVV-ja do të hetohet për të gjitha veprat po i bëjnë çdo ditë.
“Po ju them këtu, meqë sot, kuvendin e Republikës së Kosovës (Tempullin e fjalës së lirë) e ka okupuar egërsia, ku më as autoriteti i Kryetarit nuk arrinë të krijojë mundësinë e reagimit konstruktiv, se në rastin e parë të ardhjes së PDK në pushtet, do të hetoheni për këto “mostra” dhe të gjitha veprat tjera që po i konsumoni për ditë, edhe s’do të keni qare pa i gjetë, edhe nëse i keni futur atje në shpellat e Karpateve prej nga e keni origjinën ideologjike”, është shprehur ai.
Në seancën e së enjtes, Berisha e ka kritikuar partinë në pushtet se qëllimshëm nuk po e zbardh rastin e vdekjes së ish-aktivistit të LVV-së, Astrit Dehari.
Kësaj deklarate iu kundërpërgjigj ministrja Haxhiu, e cila iu drejtua opozitës dhe tha se “do ua ndalonte me ligj të flisnin për Astrit Deharin”.
“Juve ua kisha ndalu me ligj me fol për Astrit Deharin… sepse ju keni qenë në qeveri kur është vrarë Astrit Dehari, ju… Prandaj asnjë fjalë për Astrit Deharin, as edhe një fjalë, sepse ju i keni duart e lyme me gjak… Marre, duhet me pas pak ftyrë, në kohën e juve është vrarë Astrit Dehari”, ka thënë ajo. /Teve1.info/
