Sulmuesi Mërgim Berisha pritet të rikthehet në Austri por te Sturm Grazi, ekip me të cilin është në negociata intensive.
Mediumet austriake kanë raportuar se Sturmi po e sheh Berishën si përforcim të duhur për sulmin dhe po negocion me Hoffenheimin për huazimin e tij deri në fund të sezonit.
Berisha këtë sezon nuk e ka asnjë paraqitje për Hoffenheimin pasi prejse u rikthye nga huazimi ishte jashtë fushës, pjesërisht për shkak të lëndimeve.
27-vjeçari paraqitjen e fundit në një ndeshje zyrtare e ka në muajin maj të vitit të shkuar kur luajti me fanellën e Augsburgut, ekip ku ishte i huazuar nga Hoffenheimi.
Berisha ka kontratë me Hoffenheimin deri vitin e ardhshëm kurse huazimi në Austri do të ishte rikthim në një ligë ku ai mori hapat e tij të parë si profesionist.
Në total, Berisha ka 88 paraqitje në elitën e futbollit austriak për skuadrat si Salzburgu, Altach e LASK.
