Eksperti i sigurisë kibernetike, Halil Berisha, ka ngritur alarmin për një zhvillim historik në botën digjitale.
Ai deklaroi se për herë të parë, sasia e materialeve të krijuara nga inteligjenca artificiale (AI) në internet ka tejkaluar atë të përmbajtjeve të prodhuara nga njerëzit.
Berisha thekson se kjo ndryshon rrënjësisht mjedisin informativ online, duke e bërë shumë më të mundshme që përmbajtjet që qytetarët shohin çdo ditë – qoftë tekste, imazhe apo video – të mos jenë të krijuara nga njerëzit.
“Sot, është më e mundshme se kurrë që ajo që shihni në internet të jetë produkt i AI-së. Ky është një zhvillim dramatik për informimin dhe ndikimin që ka te njerëzit, duke e bërë urgjente nevojën për edukim në përdorimin e sigurt të internetit”, paralajmëroi ai në një postim në Facebook.
Sipas Berishës, rreziku më i madh lidhet me manipulimin e informacionit dhe dezinformimin, sidomos nga aktorët me motive armiqësore.
“AI nuk ka kufizime se kush mund ta përdorë. Pikërisht për këtë arsye bëhet mjet shumë i rrezikshëm në duart e shteteve jo-demokratike, si Serbia dhe Rusia,” thekson ai, duke shtuar se këto shtete tashmë tentojnë të krijojnë narrativa të rreme, të ndikojnë në opinion, të nxisin përçarje dhe të ndërhyjnë edhe në procese zgjedhore përmes përmbajtjeve të gjeneruara artificialisht.
Ai paralajmëron qytetarët që të jenë të kujdesshëm, pasi tashmë edhe videot që duken “plotësisht reale” mund të jenë të rreme, ndërsa një pjesë e komenteve dhe reagimeve online nuk krijohen më nga njerëzit, por nga sisteme të automatizuara të AI-së.
Berisha u bën thirrje qytetarëve të verifikojnë çdo informacion në burime të besueshme dhe të presin njoftime zyrtare nga institucionet e sigurisë, para se të besojnë ose shpërndajnë përmbajtje që qarkullojnë në internet. /teve1.info/
