Eksperti i çështjeve kibernetike, Halil Berisha ka ngritur shqetësimin për një aktivitet të koordinuar në rrjetet sociale, për të cilin thotë se synon nxitjen e dhunës dhe përçarjes në Kosovë.
Berisha ka thënë se profile të dyshimta dhe të rreme kanë intensifikuar aktivitetin e tyre në periudhën kur pritet vendimi i Gjykatës Speciale në Hagë.
Sipas tij, mënyra e veprimit të këtyre profileve është e ngjashme me metoda të përdorura më herët nga inteligjenca ruse për fushata ndikimi dhe nxitje të përçarjeve, përfshirë edhe raste në Shtetet e Bashkuara.
“Kjo luftë hibride dhe kibernetike është bërë prezente dhe koordinohet nga ‘troll farms’, që shpesh është dëshmuar se kanë origjinë në Rusi dhe në vende mike të saj, si Serbia”, ka deklaruar Berisha.
Ai pretendon se këto profile veprojnë në mënyrë të koordinuar, duke shpërndarë dezinformata, si dhe duke postuar e komentuar kryesisht në publikime të mediave dhe personave me ndikim.
Berisha ka bërë të ditur se gjatë hulumtimit të këtyre profileve janë identifikuar mënyra veprimi që, sipas tij, janë përdorur edhe në të kaluarën në kuadër të fushatave të ndikimit dhe përçarjes.
Ai u ka bërë thirrje qytetarëve që të jenë të kujdesshëm ndaj përmbajtjeve dhe thirrjeve që mund të nxisin tensione.
“Populli duhet të ketë kujdes që të mos bie pre e këtyre thirrjeve e dezinformatave të rrezikshme, ndërsa institucionet e Kosovës duhet t’i kenë parasysh këto profile të rrezikshme”, ka shkruar Berisha.
Berisha ka publikuar gjithashtu hulumtimin e tij, ku thotë se janë paraqitur disa prej profileve të dyshimta, thirrjet e tyre dhe mënyra e veprimit./teve1.info/
