Në seancën plenare të Kuvendit të Kosovës, deputeti nga Partia Liberale Egjiptiane, Veton Berisha, ka deklaruar se komuniteti egjiptian është i gatshëm të propozojë një kandidat konsensual për postin e presidentit të vendit, në rast se mungon një marrëveshje mes partive politike.
Duke ngritur shqetësimin për mungesën e konsensusit politik rreth zgjedhjes së kreut të shtetit, Berisha ka theksuar se është e pakuptueshme që në një vend të vogël si Kosova, partitë politike që kanë marrë besimin e qytetarëve nuk arrijnë të gjejnë një zgjidhje të përbashkët.
“Paraqesim shqetësimin se si ka mundësi që në një vend të vogël si Kosova me parti që kanë fituar besimin e qytetarëve nuk arrin të bëj dot një zgjidhje që është elementare për një konsensus për një person të vetëm i cili do ta drejtonte shtetin. Bëj thirrje, nuk po e them me ironi, edhe ne nëse vërtetë ka mbetë Kosova pa asnjë person që mund të jetë konsensual ne si komunitet egjiptian jemi të gatshëm me ofru një kandidat konsensual”, ka thënë Berisha gjatë seancës plenare në Kuvend./teve1.info/
