Kandidati për deputet nga Lidhja Demokratike e Kosovës, Sadri Berisha, ka deklaruar se fokusi i tij kryesor nëse merr përgjegjësi institucionale do të jetë sektori i shëndetësisë, duke theksuar nevojën për profesionalizëm, ndershmëri dhe reforma të qëndrueshme.
Në emisionin “Ditari” në Tëvë1, Berisha tha se vlerat që duhet t’i ketë një profesionist shëndetësor duhet të reflektohen edhe në politikë.
“Fokusi im në përgjegjësi do të jetë shëndetësia. Një mjek, një profesionist shëndetësor, së pari duhet të ketë ndershmëri dhe profesionalizëm, vlera që duhet t’i shtohen edhe politikës. Duhet të ketë disiplinë në profesionin e vet, ashtu siç duhet të ketë disiplinë edhe politika”, ka thënë Berisha.
Ai vlerësoi se sistemi shëndetësor në Kosovë ka dështuar ndër vite dhe se përgjegjësia nuk i takon vetëm një qeverie.
“Sistemi shëndetësor ka dështuar në vazhdimësi. Nuk mund ta fajësojmë vetëm një qeveri. Të gjitha qeveritë e kaluara e kanë lënë shëndetësinë anash”, u shpreh Berisha.
Sipas tij, një nga zgjidhjet kryesore për përmirësimin e sistemit shëndetësor është sigurimi shëndetësor, ndërtimi i një sistemi informativ shëndetësor dhe rregullimi i procesit të specializimeve mjekësore.
“Fillimi i zgjidhjeve në shëndetësi është sigurimi shëndetësor, pastaj krijimi i sistemit informativ shëndetësor dhe specializimet, ku po dështojmë më së shumti. Një prej arsyeve pse mjekët e rinj po largohen nga Kosova është vonesa në ndarjen e specializimeve”, tha ai.
Berisha theksoi se LDK-ja e ka prioritet sigurimin shëndetësor në programin e saj qeverisës.
“Lidhja Demokratike e Kosovës si pikë të parë e ka sigurimin shëndetësor, i cili do të fillojë qysh në vitin e parë. Një prej pikave të tjera është sistemi informativ shëndetësor, që nënkupton se qytetari nuk do të vijë më me shumë letra, por vetëm me një kartelë”, ka deklaruar Berisha.
Ai shtoi se reformat në shëndetësi janë thelbësore për ndaljen e migrimit të profesionistëve shëndetësorë dhe për ofrimin e shërbimeve më cilësore për qytetarët.
