Kryedemokrati Berisha argumenton se këtë e ka konstatuar gjatë bisedimeve të shumta me banorët në Lazarat pas takimit që ka pasur atje ditën e shtunë.
“Në bisedimet e shkurtra në Lazarat, konstatova se Edi Rama dhe Saimir Tahiri kanë kryer krime kundër njerëzimit në këtë fshat. Krime të vërteta me operacionin e tyre anti-drogë. Bandat kriminale me uniformë nuk kanë ngurruar të vendosin tytën e automatikut fëmijës 2-3 vjeçar, nënës që mbronte fëmijët, kryeplakut të fshatit t’i shkrehin breshëritë pse bënte detyrën. Një terrorizëm të tillë, Lazarati nuk e ka parrë kurrë në jetën e tij. Unë i garantoj banorët se shumë shpejt do organizoj skuadra dhe grupe hetime për të mbledhur dhe evidentuar këto krime. Edi Ramës i them se do marrë ndëshkimin e merituar për këto krime. Ne mbetemi parti e zbatimit të ligjit, por nuk mund të pranojmë kurrë brutalitete ndaj personave pa asnjë lidhje me operacionin e tyre”, ka thënë Berisha.
Gjatë fjalës së tij, Kryetari i PD-së është ndalur dhe tek takimi që ka pasur me banorët e Gjirokastrës. Kryetari i PD-së Berisha ka theksuar se në Gjirokastër qeveria po ndjek një politikë për shpopullimin e saj.
“Politikë jashtëzakonisht perfide për shpopullimin e kësaj zone ndiqet nga qeveria. Largimi i të gjitha institucioneve nga Gjirokastra, kishte boshatisur si qendër administrative si kurrë në ekzistencën e saj në shekuj. Nuk më hiqet nga mendja një nënë pensioniste që më thotë: i thuaj Edi Ramës, si mund të shkoj unë në Tiranë për një certifikatë me pensionin që kam. Nuk udhëtoj dot, se rruga më kërkon aq para se marr unë pension. Dhe unë mbetem pa shërbim, pa certifikatë. Kjo gjendje shprehej në mënyrë të dhimbshme në universitetin e Gjirokastrës. Nga një qendër e fuqishme rajonale, sot atje dominonte mungesa masive e studentëve dhe boshatisja e universitetit. Në një farë mënyre, të gjitha masat e kësaj qeverie çonin në vdekjen e një qyteti, që sot qëndron në kurorën e trashëgimisë kulturore botërore”, tha ai./tvklan.al/
