Beqa në emisionin “Ditari” në Tëvë1, ka thënë se nuk ka shkelje gjatë formimit të Komisionit dhe sipas tij, nëse LVV-ja pretendon se ka shkelje le ta dërgojë në Kushtetuese.
“Nuk ka shkelje gjatë formimit të Komisionit, nëse Vetëvendosje pretendon se ka shkelje, nuk duhet të frikësohet në zbardhjen e së drejtës por nëse mendon se ka shkelje mund ta dërgojë në Gjykatën Kushtetuese”, tha ai.
Ai thotë se PDK-ja ka qenë e qartë në inicimin e këtij projekti, pasi sipas tij, LVV-ja nuk ka ide si të del nga situata me energjinë elektrike.
“PDK-ja ka qenë e qartë është iniciuese e këtij projekti të zbardhjes së menaxhimit të energjisë elektrike në kohë krize. Ne kemi pasur një paralajmërim nga fundi i shtatorit por edhe në seanca kemi pasur rekomandime konkrete në tremujorshin e vitit të kaluar, por periudhën në të cilën jemi tani, kemi konsideruar që mazhoranca nuk ka një ide si të del nga kjo situatë. Frika e mazhorancës për të bërë një komision të tillë, lë për të dyshuar, çfarë po fshihet aty, pse nuk po dojnë me pas një transparencë për opinionin”, tha ai.
Beqa ka deklaruar se PDK-ja nuk po dëshiron asgjë më shumë se sa të zbardhet menaxhimi, veprimet dhe mosveprimet e ZRRE-së, KEK-ut, KOSTT-it dhe Qeverisë.
“Ne po duam me pa se si ka shkuar menaxhimi i energjisë elektrike… si janë shpenzuar mjetet, sa energji kemi blerë, prej kujt e kemi blerë, çfarë kompani kanë qenë, cili ka qenë çmimi i blerjes, cili ka qenë çmimi i energjisë në treg, sa ka qenë kërkesa e konsumatorëve. Ne nuk po duam asgjë më shumë sesa me u zbardh menaxhimi dhe veprimet dhe mosveprimet e akterëve nga ZRRE-së, KEK-u, KOSTT, dhe Qeveria”, tha më tej ai. /teve1.info/
