Deputeti i PDK-së, Hajdar Beqa ka thënë se LVV përqindjen e votave të publikuar në sondazhin e fundit mund ta shohë vetëm në ëndërr.
Beqa tha se këto sondazhe janë të fabrikuara dhe rezultatet e sakta do të shihen më 9 shkurt.
Tutje, ai tha se është i bindur që PDK do të dalë e para.
“Unë nuk i kisha komentu këto sondazhe, ato ma të mirat do t’i shihni më 9 shkurt ku qytetarët do të vendosin. E them me përgjegjësi, bindje dhe besim duke parë edhe situatën në teren që PDK është larg nga kjo përqindje, kurse LVV është shumë poshtë. Këto sondazhe janë të fabrikuara… atë përqindje mund ta sheh në ëndërr LVV, por jo më në realitet…Ne nuk mundemi me qitë kësi sondazhe qesharake, edhe ata që i kanë postu e dinë që nuk janë të sakta”, ka deklaruar ai në emisionin “Info Nata” në Tëvë1.
Ndryshe, në një sondazh të fundit të kryer nga organizata “UBO Omnibus” e nxjerr VV-në me mbi 47 për qind në zgjedhjet e 9 shkurtit.
Në fotografinë e publikuar, Vetëvendosje del se prin në garën për zgjedhjet e përgjithshme me 47.1 për qind. Pas saj, është Partia Demokratike e Kosovës me 19.5 për qind, Lidhja Demokratike e Kosovës me 17.7 për qind dhe Aleanca për Ardhmërinë e Kosovës me 6.5 për qind./teve1.info
