Kryeministri në detyrë, Albin Kurti ka hedhur akuza në drejtim të Beogradit, se po kërcënon serbët e Kosovës në mënyrë që ata ta votojnë Listën Serbe.
Komentet Kurti i bëri kur u pyet për arrestimin e shtatë personave të Graçanicë, të cilët dyshohet se i kërcënuan serbët.
“Fjalët e ministrit për Komunitete dhe Kthim, Nenad Rashiq, në mbledhjen e fundit të qeverisë mbi trysninë e tmerrshme që po bëhet nga Beogradi për serbët e Kosovës për ta votuar Listën Serbe, duke përcjellë edhe rrjetet sociale të secilës figurë publike, secilit politikan serb që ka garuar qoftë një herë, me të vërtetë janë alarmuese. Këtë lloj terrori që po e bën Beogradi e kemi të dëshmuar nga ankesat e serbëve të Kosovës. Është fenomen që ka marrë përmasa të mëdha dhe të thella si asnjëherë më parë në këto vite sa jam kryeministër”, ka thënë Kurti.
E vet Nenad Rashiq, në një deklarim për Tëvë1, tregoi se Serbia madje po i detyron serbët e Kosovës që të organizojnë edhe protesta.
E këtë Kurti po e konsideron si një tendencë të Serbisë për të krijuar dualizëm shtetëror brenda Kosovës.
“Serbia vazhdimisht mundohet të ketë elemente të saj, përmes së cilave dëshiron të krijojë dualizma shtetërorë brenda territorit tonë sa i përket funksionimit të institucioneve, shërbimeve publike. Ato janë veprime ilegale në shtetin tonë të pavarur. Republika jonë i ka pushtetet e ndara, ne jemi ekzekutivi, legjislativi nuk është funksional, por gjyqësori e prokuroria vendosin në mënyrë të pavarur. E kanë mbështetjen e plotë të qeverisë për ta mbrojtur sundimin e ligjit dhe zbatimin e tij të plotë pa dallim. S’ka të bëjë me etninë e asnjë qytetari që ndalohet, kjo ka të bëjë me dyshimet mbi veprime e tyre”, ka thënë tutje Kurti.
E në këtë konferencë për media, Kurti u pyet edhe për çështjen e themelimit të xhandarmërisë.
Gjatë ditës së djeshme, ministri në detyrë i punëve të brendshme, Xhelal Sveçla nënshkroi themelimin e grupit punues, i cili do të bëj analizimin dhe propozimin e modaliteteve për funksionimin e Xhandarmërisë së Republikës së Kosovës, si Agjencion i Ministrisë së Punëve të Brendshme.
