Autoritetet serbe kanë përsëritur qëndrimin se dinamika e dialogut ndërmjet Kosovës dhe Serbisë është e lidhur drejtpërdrejt me themelimin e Asociacionit të komunave me shumicë serbe në Kosovë.
Sipas të ashtuquajturës Zyra për Kosovën në Qeverinë e Serbisë, kryenegociatori serb Petar Petkoviq i ka thënë të dërguarit të Bashkimit Evropian për dialogun, Peter Sorensen, se pa lëvizje konkrete në drejtim të krijimit të Asociacionit nuk mund të pritet përparim domethënës në procesin e dialogut.
Gjatë takimit, Petkoviq ka kërkuar nisjen e menjëhershme të diskutimeve për draftstatutin e Asociacionit, duke theksuar se ky hap, sipas tij, është parakusht për vazhdimin e bisedimeve ndërmjet dy palëve.
Ai ka kritikuar gjithashtu ligjet e Kosovës që lidhen me të huajt dhe automjetet, duke pretenduar se këto rregullime ligjore po e përkeqësojnë pozitën e komunitetit serb. Në këtë kontekst, Petkoviq ka akuzuar institucionet e Kosovës për veprime të njëanshme dhe përshkallëzuese, duke pohuar se serbëve në Kosovë po u cenohet liria e lëvizjes, qasja në shërbime shëndetësore dhe arsimore, si dhe siguria personale.
Ndërkohë, emisari evropian Peter Sorensen, para qëndrimit në Beograd, ka zhvilluar vizitë në Prishtinë, ku është takuar me kryeministrin në detyrë të Kosovës, Albin Kurti. Kurti ka shprehur gatishmërinë e Qeverisë së Kosovës për normalizimin e marrëdhënieve me Serbinë, por ka theksuar se ky proces kërkon veprime të qarta nga pala serbe. Ai ka kërkuar dorëzimin e Milan Radoiçiqit, të cilin e ka cilësuar si përgjegjës për sulmin në Banjskë, tërheqjen e letrës së ish-kryeministres serbe Ana Bërnabiq, përmes së cilës Serbia kishte shprehur rezerva për zbatimin e disa pikave të marrëveshjeve, si dhe nënshkrimin formal të Marrëveshjes Bazike dhe Aneksit të saj.
Sipas Kurtit, vetëm përmes këtyre hapave mund të krijohet besim dhe të hapet rruga për përparim real në dialogun e ndërmjetësuar nga Bashkimi Evropian. /teve1.info/
