I shoqëruar nga krerët e Vetëvendosjes dhe LDK-së, Bekim Sejdiu, bëri paraqitjen e parë në Kuvend, si kandidat konsensual për President.
Në fjalimin e tij, profesori Sejdiu tha se si motiv të parë kur mori propozimin për President, e kishte të vihet në shërbim të Republikës.
Por kush është Bekim Sejdiu, emri i të cilit doli si zgjidhje konsensuale nga takimet e gjata mes Vetëvendosjes dhe LDK-së?
I lindur në vitin 1974, Sejdiu ka një karrierë të gjatë në drejtësi, diplomaci dhe akademi.
Për të, pozita më e lartë në shërbimin publik, ishte emërimi si gjyqtar në Gjykatën Kushtetuese në vitin 2015, detyrë të cilën e ushtroi deri në qershorin e vitit 2021.
Në Kushtetuese, ndër lëndët më të rëndësishme në trajtim, Sejdiu si gjyqtar referues, e kishte legjitimitetin e qeverisë Hoti. Asokohe, në dhjetorin e vitit 2020, Gjykata e shpalli të pavlefshëm votimin e qeverisë, duke e dërguar vendin në zgjedhje.
Sa ishte i angazhuar në Gjykatën Kushtetuese, Sejdiu njihet për mospajtimet e shpeshta me vendimet e kolegëve të tij.
E para se të emërohej si gjyqtar Bekim Sejdiu ka shërbyer si diplomat në Ministrinë Punëve të Jashtme të Republikës së Kosovës.
51 vjeçari i takon brezit të parë të ambasadorëve të Republikës së Kosovës.
Nga viti 2008 deri në vitin 2012 ka shërbyer si Ambasador i Republikës së Kosovës në Republikën e Turqisë. Më pas ai është shpërngulur në Neë York, ku deri në vitin 2014 ka punuar si Konsull i Përgjithshëm i Republikës së Kosovës.
Përveç në diplomaci e drejtësi, Sejdiu që nga viti 2002 ka dhënë kontribut edhe në arsimin universitar.
Ai është profesor në Fakultetin Juridik të Universitetit të Prishtinës.
Profesori Sejdiu ka përfunduar studimet juridike në Fakultetin Juridik të Universitetit të Prishtinës në vitin 1999.
Poashjtu ka përfunduar dy magjistratura: në fushën e marrëdhënieve ndërkombëtare, në Universitetin e Bilkentit, dhe në fushën e demokracisë dhe të të drejtave të njeriut, në Universitetin e Sarajevës dhe në Universitetin e Bolonjës.
Sejdiu gjithashtu ka doktoruar në fushën studimeve ndërkombëtare dhe diplomatike në Fakultetin e Qeverisë dhe të Studimeve Evropiane – Nova Univerza, në Slloveni.
